2009 - Qishloq taraqqiyoti va farovonligi yili

O‘zbekiston Respublikasi Prezidentining Qarori

«Qishloq taraqqiyoti va farovonligi yili» davlat dasturi to‘g‘risida

(O‘zbekiston Respublikasi qonun hujjatlari to‘plami, 2009 y., 5-son, 33-modda; 2010 y., 17-son, 130-modda)
Qishloqning ishlab chiqarish va ijtimoiy infratuzilmasini yanada rivojlantirish, iqtisodiyotning agrar sektori samaradorligini oshirish, qishloq xo‘jaligida iqtisodiy islohotlarni chuqurlashtirish ishiga yangi qudratli turtki berish, qishloq xo‘jaligi mahsulotlarini chuqur qayta ishlaydigan zamonaviy korxonalarni jadal barpo etish, qishloqda, avvalo yoshlar o‘rtasida bandlik o‘sishini ta’minlash, qishloq aholisining daromadlari va turmush sifatini oshirish bo‘yicha chora-tadbirlarning keng kompleksini amalga oshirish maqsadida, shuningdek 2009 yil O‘zbekiston Respublikasida Qishloq taraqqiyoti va farovonligi yili deb e’lon qilinganligi munosabati bilan:
1. «Qishloq taraqqiyoti va farovonligi yili» Davlat dasturi ilovaga muvofiq tasdiqlansin. Davlat dasturi quyidagilarga yo‘naltirilgan:
qishloq aholisining manfaatlarini yana ham to‘liqroq ta’minlash maqsadida qonunchilik bazasi va normativ-huquqiy bazani yanada takomillashtirish va mustahkamlash;
qishloq qiyofasini sifat jihatdan yaxshilash, rivojlanish va arxitektura — reja asosida qurilish bosh sxemalariga muvofiq qishloq aholi punktlari qurilishi, qishloqdagi turar-joy va ijtimoiy soha ob’ektlari namunaviy loyihalar bo‘yicha barpo etilishini nazarda tutuvchi qishloq aholi punktlarining arxitekturaviy rejalashtirilishini tashkil etish va qishloq qurilishini loyihalashtirish tizimini tubdan takomillashtirish;
ishlab chiqarish va ijtimoiy infratuzilmasini yanada rivojlantirish asosida qishloqdagi turmush sifatini oshirish, qishloq aholi punktlarini transport kommunikatsiyalari, toza ichimlik suvi bilan ta’minlash, ayniqsa borish qiyin bo‘lgan va olis qishloq aholi punktlari telekommunikatsiya tarmoqlari va pochta aloqasi bilan qamrab olinishini oshirish;
mamlakatning o‘zida qurilish materiallari ishlab chiqarishni kengaytirish, yig‘ma konstruktsiyalar va mahalliy materiallardan foydalangan holda qishloqda ob’ektlar qurishning industrial va yig‘ma texnologiyalarini joriy etish;
qishloqni mavjud energiya va gaz ta’minoti ob’ektlarini rekonstruktsiya qilish va shunday yangi ob’ektlar qurish hisobiga zarur energetika resurslari bilan uzluksiz va kafolatli ta’minlash bo‘yicha shart-sharoitlar yaratish;
qishloq xo‘jaligida iqtisodiy islohotlarni izchil chuqurlashtirib borish, fermerlik harakatini yanada qo‘llab-quvvatlash, uning moddiy va moliyaviy bazasini mustahkamlash, qishloqda shakllanayotgan yangi mulkiy munosabatlar, o‘rta sinf — mulkdorlar, tadbirkorlar, ishbilarmonlar manfaatlari ishonchli himoya qilinishini ta’minlash;
2008 — 2012 yillarda sug‘oriladigan erlarning meliorativ holatini yaxshilash yuzasidan tasdiqlangan Davlat dasturiga muvofiq, eng avvalo, erlarning meliorativ holatini yaxshilash bo‘yicha aniq maqsadga yo‘naltirilgan kompleks chora-tadbirlarni bajarish asosida tuproq unumdorligini tubdan oshirish;
qishloqda sanoat ishlab chiqarishi va qurilishni yanada jadal rivojlantirish, meva-sabzavot va chorvachilik mahsulotlarini qayta ishlash bo‘yicha zamonaviy texnika va texnologiyalar bilan jihozlangan ixcham korxonalarning keng tarmog‘ini tashkil etish, xizmat ko‘rsatish va servis sohasini sifat jihatidan yangi darajaga ko‘tarish, shu asosda qishloq aholisi, eng avvalo yoshlar ishga joylashtirilishini, insonlarning daromadlari va farovonligi oshirilishini ta’minlash;
insonlar salomatligi muhofaza qilinishini yaxshilash, qishloq aholisining tibbiy madaniyatini yuksaltirish, qishloqda umumiy va kasb-hunar ta’limi tizimini yanada rivojlantirish va uning darajasi hamda sifatini oshirish, qishloq maktablari va kasb-hunar kollejlarining moddiy bazasini mustahkamlash.
2. O‘zbekiston Respublikasi Prezidentining 2008 yil 11 dekabrdagi R-4023-son farmoyishiga muvofiq tashkil etilgan Respublika komissiyasi zimmasiga «Qishloq taraqqiyoti va farovonligi yili» Davlat dasturi bajarilishini tashkil etish va uning monitoringini olib borish vazifasi yuklansin.
Qoraqalpog‘iston Respublikasi va viloyatlarda Qoraqalpog‘iston Respublikasi Vazirlar Kengashi Raisi va viloyatlar hokimlari boshchilik qiladigan tegishli hududiy komissiyalar tashkil etilsin hamda ular zimmasiga respublika mintaqalarida Dasturda nazarda tutilgan chora-tadbirlarning belgilangan muddatlarda so‘zsiz va sifatli amalga oshirilishi uchun shaxsan javobgarlik yuklansin.
3. «Qishloq taraqqiyoti va farovonligi yili» Davlat dasturini amalga oshirish bo‘yicha Respublika komissiyasi (Sh.M. Mirziyoev):
ikki hafta muddatda vazirliklar, idoralar, xo‘jalik birlashmalari, jamoat tashkilotlari, Qoraqalpog‘iston Respublikasi Vazirlar Kengashi va viloyatlar hokimliklari tomonidan «Qishloq taraqqiyoti va farovonligi yili» hududiy va tarmoq dasturlari ishlab chiqilishi hamda qabul qilinishini ta’minlasin;
Dasturga kiritilgan chora-tadbirlar amalga oshirilishi ustidan tizimli nazorat o‘rnatsin hamda davlat boshqaruvining tegishli respublika va hududiy organlari, shuningdek jamoat va nohukumat tashkilotlarining faoliyatini muvofiqlashtirsin;
har chorakda Dasturning amalga oshirilishiga doir materiallar O‘zbekiston Respublikasi Vazirlar Mahkamasining majlislarida ko‘rib chiqilishi uchun kiritilsin;
yilning har choragi yakunlari bo‘yicha O‘zbekiston Respublikasi Prezidenti Devoniga ushbu qaror bilan tasdiqlangan Dasturning bajarilishi to‘g‘risida axborot berib borsin.
4. O‘zbekiston matbuot va axborot agentligi, O‘zbekiston Milliy axborot agentligi, Milliy teleradiokompaniyasi, ommaviy axborot vositalari Dasturning maqsad va vazifalari keng tushuntirilishini, uni amalga oshirish, qishloqni rivojlantirish, obodonlashtirish va uning qiyofasini sifatli o‘zgartish bo‘yicha Dasturda nazarda tutilgan tadbirlarni bajarishga tarmoq va mahalliy boshqaruv organlari, jamoat va nohukumat tuzilmalarining aniq hissasi muntazam yoritib borilishini ta’minlasinlar.
5. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoev zimmasiga yuklansin.

O‘zbekiston Respublikasi Prezidenti I. KARIMOV


Toshkent sh.,
2009 yil 26 yanvar,
PQ-1046-son

Dasturni yuklab olish